MANILA – Hindi na umano umaasa si presidential chief of staff Michael Defensor na makakukuha ng patas na pagdinig sa kasong perjury na isinampa niya laban kay Rodolfo Lozada Jr., kaya iuurong na niya ang reklamo.
Sa ulat ng dzBB radio nitong Huwebes, sinabing nagpadala na umano si Defensor ng sulat kay Manila Metropolitan Trial Court Branch 26 Presiding Judge Jorge Emmanuel Lorredo na nagsasaad na hindi na siya interesadong isulong ang kaso kay Lozada.
Si Lozada ay naging testigo ng Senado sa ginawang imbestigasyon sa kinanselang national broadband network project sa ZTE Corp ng China.
Ginawa umano ni Defensor ang hakbang sa mismong araw na itinakda ng korte ang pre-trial sa inihain niyang kaso laban kay Lozada.
Inihayag umano ni Defensor sa ulat na hindi na siya umaasa na magiging patas ang gagawing pagdinig sa kanyang kaso.
Una rito, pinayuhan ni Lorredo si Defensor na iurong na ang demanda kay Lozada dahil posibleng makaladkad sa pagdinig sina Pangulong Gloria Arroyo at First Gentleman Jose Miguel Arroyo.
Ang naturang payo ni Lorredo ay hindi naman nagustuhan ni Justice Sec. Raul Gonzalez at kinastigo ang naturang hukom.
Sa kabila nito, umaasa umano si Defensor na makakakuha siya ng patas na pagdinig sa ibang lugar ngunit hindi binanggit kung saan.
Ang kaso ni Defensor ay kaugnay “pagsundo" kay Lozada nang dumating sa Ninoy Aquino International Airport noong Pebrero 5, 2008 mula sa Hong Kong.
Sinabi ni Lozada na “dinukot" siya ng mga tauhan ng gobyerno upang pigilan siyang dumalo sa gagawing imbestigasyon ng Senado tungkol sa $329.48-milyong broadband deal.
Idinagdag ni Lozada na pinakiusapan siya ni Defensor na itanggi na may kinalaman ang pamahalaan sa naganap na “pagdukot" sa kanya. Mariin naman itong pinabulaanan ng dating opisyal na naging dahilan ng pagsasampa niya ng kaso. - GMANews.TV
No comments:
Post a Comment